भिरांकूळ रात

 

भिरांकूळ रात

जॉन आगियार

हांव केदनाच भिना, पूण त्या दिसा भिल्लों...
हर्शीं हांव पिना, पूण त्या दिसा पिल्लों.

गुप्प काळोख आशिल्लो रसत्यार,
स्लो चालताली म्हजी कार,
इतल्यान धवी सांवळी आयली मुकार,
हांवें सुरू केलें कसले तरी कांतार.
मनित भंय ,घामागूम जाल्लों...
धीट मनीस हांव, पूण भितरल्यान हाल्लों...
हांव केन्नाच भिना, पूण त्या दिसा भिल्लों.

ती फुडें रावून लिफ्ट मागतली,
पांय दिसनासले, वार्यार उबताली,
पॅण्ट म्हजी ओली जावंक लागताली,
डॅशबोर्डचेर अर्दी बाटली पी सांगताली
पूण हांव तसोच थंयच घल्लों
हांव केदनाच भिना, पूण त्या दिसा भिल्लों,
हर्शीं हांव पिना, पूण त्या दिसा पिल्लों.

कार चलयली नेटान हांवे, फाटीं पळोवना,
पूण आरश्यांतली ती सांवळी वचुन वचना.
सोरो पिल्लो तो सगळो निवळ्ळो नशा ,
जीण जगपाची मनांत जागयली आशा
कशेबशेन संकश्टांतल्यान भायर‌ सल्लों
हांव केदनाच भिना, पूण त्या दिसा भिल्लों,
हर्शीं हांव पिना, पूण त्या दिसा पिल्लों.

उलो मारील्लो तिणें, आनी वाऱ्यार उडून गेली,
डॅशबोर्डचेर ती बाटली मात थंयच उरली.
त्या राती उपरांत हांवें पियेवप सोडलें,
कारण त्या धव्या सांवळेन सगळें बदलून उडयलें.
त्या दिसा जर फूटना जाल्यार शेर्त मेल्लों
हांव केदनाच भिना, पूण त्या दिसा भिल्लों...
हर्शीं हांव पिना, पूण त्या दिसा पिल्लों.