घड्यावपी आनी देव
जॉन आगियार
मातयेचो तो गूळो घेवन,
जीव ओतून ताका आकार दिता,
रंगा फाटल्यान माया लिपोवन,
तो देवाचें रूप सजयता.
दुकानाच्या फळ्यार रांगेन दवरून,
तो गिरायकांची वाट पळयता,
पोटाची भूक भागोवपा खातीर,
तो आपल्याच देवाची विक्री करता.
लोकांक दिसता तो फकत वेपारी,
पुण देव जाणा ताची वळख खरी!
फकत हाता जोडप हि भक्ती न्हय
भक्ती आसता खर्या कश्टांत खंय
देव घड्यता रात-दीस जागोवन जो,
रावता ताच्या काळजात देवूच तो
विकप ताचो वेवसाय, नासूं तो भक्त,
तरी ताच्या बोटांत आसा देवाचीच शक्त ,
जो दुसऱ्याच्या घरांत देव बसयता,
देवाक तो आपल्या कलेंतल्यान हासयता.
No comments:
Post a Comment