काळजाचे नाते....
जॉन आगियार
रगताचें नातें नासूनूय,
काळजाची तूं भयण जालें,
घरच्या आमच्या आंगणांत,
राखी घेवन तूं पावलें.
नांवांतूच तुज्या 'पूर्णिमा' आसा,
उजवाड म्हज्यांत हाडलो,
एकल्या आसपी ह्या भावाक,
एकचाराचो घास वाडलो
तो रेशमी घागो न्हय,
तें एक पवित्र उतर ,
दशकां पासून सांबाळल्लो,
मोग काळजांत भितर
मामाचो मान दिल्लो देखून,
दोळे सुखांन भरून आयले,
लग्नाच्या त्या माटवांत,
खरें नातें म्हाका कयळें
रगत नासल्यार कितें जालें?
मोग आमचो चड
गोयच्या ह्या मातयेंत,
आमचो एकचार व्हड.
आमची ही 'राखी' बंघन
सदांच 'घट्टमूट' उरूं,
जल्मा जल्मांत फुडेंच
वचूं आमचे हे तारुं
No comments:
Post a Comment