दोळ्यांची भास.....
जाॅन आगियार
दोळ्यंक दोळ्यांची भास
समजलीच ना
म्हजी उतरां तूजे मेरेन
आनी तूजीं म्हजें मेरेन
पावलीच ना
तूवें थोडें सांगपाचें म्हाका
हांवें थोडें म्हणपाचें तूका
तरण्या काळजांक हीं गणीतां
जमलींच ना
एका थांब्यार आमचीं मना
रावलींच ना
आमची उतरां तोणांतल्यान भायर
पावलींच ना
फूलां फूलना....
जाॅन आगियार
म्हज्या काळजाक किदें जालां
कांयच म्हाका कळना
दोतोरांक दाखयले पूण
उपाय ताचेर मेळना
दूकां म्हजी सूकूंन गेल्यांत
एकय दूक गळना
झाडां मोगाचीं बावूंन गेलीं
फूलां आता फूलना
कशीं.....
जाॅन आगियार
तूजीं पत्रां अजून दवरल्यांत
जळयतलो कशीं
पत्तो बदल्ला तूजो आतां
उतरां कळयतलों कशीं
न्हीद पूराय जायना म्हजी
सपनां पळयतलो कशीं
जिणे सूर शेणल्यत
गितां गायतलों कशीं
कामना....
-जाॅन आगियार
काळजाक केल्लो घावो तूवें
रगत अजून थामना
मन म्हजें अस्वस्त जालां
खंयच आतां रमनां
फटिगपणाचे भूरखे घालून
म्हाका मीरोंवक जमना
केन्ना कांय पूरी जायत
म्हज्या मनची कामना
दूकां.....
-जाॅन आगियार
काळो चश्मो घाल्यार दोळ्यांत
काळेंच तूं पळयतोलो
तकलेंत वायट आसल्यार तूज्या
वायटच तूं उलयतोलो
स्वार्थ आनी रागान भरल्यार
दूसर्याक तूं जळयतलो
काळीज अशें निबर केल्यार
दूकां कशीं गळयतलो?
नसायेच्या जगांत
नसायेच्या जगांत ह्या
मोगा राज्य बसोवया
दूकां पुसून रडटल्याचीं
सगळ्यांक आमी हांसोवया
सगळ्यांक आमी हांसोवया
दुख्ख कोणाक चुकना
भोगचें आसा भोगुया
वाटेर कांटे आसूं दि
काढुन फुलांनी न्हेसोवया
दूकां पुसून रडटल्याचीं
सगळ्यांक आमी हांसोवया
सगळ्यांक आमी हांसोवया
मन धीट करून आमी
ताट मानेन जगुया
संवसारांतलीं वआयटआं
एकवटान लासोवया
दूकां पुसून रडटल्याचीं
सगळ्यांक आमी हांसोवया
सगळ्यांक आमी हांसोवया
दामबाबा तु पाव रे
जाॅन आगियार
आमच्या उल्याक धाव रे
राख तु पावला पावलाक आमकां
आमच्याच काळजांत राव रे
भक्ताच्या उतरांतल्यान
तूच देवा उलयता
सर्व शक्तिशाली खरो
तूच जग हें चलयता
गरजेवन्तांक आदार करपी
म्हण तुजे नाव रे
दामबाबा तु पाव रे !
आमच्या उल्याक धाव रे
तुजे शांत रूप पळौवन
मनांक मेळटा धादोसकाय
आलतडीन आमचे व्हडे
देवा पलतड़ीन पाय
त्रासांत आसल्यार आमी
देवा फाटल्यान आमच्या राव रे
दामबाबा तु पाव रे !
आमच्या उल्याक धाव रे
वाट गूस्पल्या.....
-जाॅन आगियार
वाट गूस्पल्या म्हजी
देवा तूजो हात दी
गूप्प काळोख मूकार
उजवाडाची वात दी
थकलां जीणेत आतां
विसव घेवंक रात दी
ओळख शेणल्य देवा
म्हाका एक "जात" दी
कशे.....?
-जाॅन आगियार
तूजे औठ म्हज्या दोळ्यांक
हळूच फूकूंन गेले
तूजे मोने ईशारे आज
म्हज्या मनांक मोखून गेले
वाट पळयत पळयत तूजी
म्हजे दोळे थकून गेले
फाटीर घोलपी केंस तूजे
म्हजे काळीज जिकून गेले
मोगाचे पेले दवरलेले भरून
कशे रकून गेले?
नाचत नाचत यो गणराया
-जांँन आगियार
नाचत नाचत यो गणराया
वक्रतुण्ड तूं महाकाय
श्री गजानऩा लम्बोदरा
शूर वीर तूं गणाचो राजा
काळजांत रावता भक्तांच्या
विघ्न विनाशक प्रभु तूं,
सिद्धि विनायकय तूंच देवा,
नाचत नाचत यो गणराया
वक्रतुण्ड तूं महाकाय
श्री गजानऩा लम्बोदरा
मोदक लाडू खायत यो
हसत नाचत गायत यो
पयले पूजन करतल्यांक,
मेळता कृपेची माया
नाचत नाचत यो गणराया
वक्रतुण्ड तूं महाकाय
श्री गजाऩा लम्बोदरा
जीण म्हळ्यार.....
-जॉन आगियार
जीण दुखाचो दर्या
जीण कीर्णाचो सुर्या
जीण म्हळ्यार एक भास
जीण तुटील्या मनाची आस
जीण म्हळ्यार एक व्हडें
जीण म्हळ्यार कुवाडें
जीण देवाचें गुपीत
जीण एक कवीत
जीण संवसाराची रीत
जीण म्हळ्यार एक प्रीत
जीण मधुर संगीत
गीत गायत यो...
-जॉन आगियार
कसलेंय संकट येंव दी धीट जायत यो
वाट अनोळखी आसत तर तूं गीत गायत यो
जिविताचो खेळ, संवसाराचो मेळ
बरें जावपाक केन्नाय लागता वेळ
संवसारांचे झटके मातशे खायत यो
घडचें आसा घडटलें, घट्ट जायत यो
कसलेंय संकट येंव दी धीट जायत यो
वाट अनोळखी आसत तर तूं गीत गायत यो
पावलां सारकीं मार जिणेत सकयल पडनाका
पडलो जाल्यारय उट बेगीन ओगीच रडनाका
वाटेच्या घायांक तूं वखद लायत यो
काळीखी जर वाट जाल्यार वात लायत यो
कसलेंय संकट येंव दी धीट जायत यो
वाट अनोळखी आसत तर तूं गीत गायत यो
शांतादूर्गे आई
-जाॅन आगियार
शांतादूर्गे आई म्हजे तुंच शांती दूत
आमी तूज्यो घूवो आनी पूत
माये आमी तूज्यो घूवो आनी पूत
दोळे लावून थकलो तुज्या वाटेक
आयलां हाव गे आतां तुज्या भेटेक
आमच्या जीणेतलो काळोख काडून
उजवाडाची किर्णां म्हज्या काळजांत फाकय
वाट अडल्या पावला जैताची दाखय
शांतादूर्गे आई म्हजे तुंच शांती दूत
आमी तूज्यो घूवो आनी पूत
माये आमी तूज्यो घूवो आनी पूत
जगांत शांती घडयल्या गे तूवे
वायटकारांक घालां तूवें दावें
तीन्ही लोकांत कीर्ती तूजी
तूज्याच उजवाडान आमचीं काळजां पेटय
संकटांन पडल्यांत जाल्यार आमकां वाटय
शांतादूर्गे आई म्हजे तुंच शांती दूत
आमी तूज्यो घूवो आनी पूत
माये आमी तूज्यो घूवो आनी पूत
दोळे लावून थकलो तुज्या वाटेस
आलो आतां मी तुज्याच भेटेस
आमच्या आयुश्यातला काळोख काडून
उजेडाची किर्णं माज्या काळजात पाठव
वाट अडली पावलं यशाची दाखव
शांतादुर्गे आई आहेस तुच दूत
आम्ही तुज्याच मुली आनी पुत्र
आई आम्ही तुज्याच मुली आनी पुत्र
देवा बोडगेश्वरा
--जाॅन आगियार
आंगवण घेवन आयल्यात देवा बोडगेश्वरा
दर्शना शिवाय तूज्या आतां रांव नजो
दयावान तूं देवा सगळ्यांचें आयकता
भक्तांक किदें ना किदें तूं दिता
तूज्या भक्तीचो काळजानी उजो
आमी सगळे तूजे आनी तूं देवा म्हजो
आंगवण घेवन आयल्यात देवा बोडगेश्वरा
दर्शना शिवाय तूज्या आतां रांव नजो
बोडगिणीं रावन सगळ्यांक नदर दवरता
राखणदार तूच भक्तांक सावरता
जागृत दैवत तूंच सगळें उलयता
मन शांत जाता प्रभाव तूजो
आंगवण घेवन आयल्यात देवा बोडगेश्वरा
दर्शना शिवाय तूज्या आतां रांव नजो
देवा रमनाथा
--जाॅन आगियार
कितलें गोड नांव तूज़ें देवा रमनाथा
औठार सदांच उरूदी
जीण म्हजी तूज़ेंच सेवेंत सारुंदी
तुज्या म्हज्या वाटेर देवा
संवसाराचीं दोरां पांवची नांत
फाटीर आमच्या हात तूजो
वायटां लागींच रांवची नांत
तूज़ेंच भक्तीन आमचीं काळजां भरूदी
कितलें गोड नांव तूज़ें देवा रमनाथा
औठार सदांच उरूदी
जीण म्हजी तूज़ेंच सेवेंत सारुंदी
तूजो खरो आदार देवा
काळी वाटेर तूच वात
जीण केन्नाय भटकत जाल्यार
तूंच गा म्हजो सांगात
अरीश्टां कितलय येंव
मनांत ताचीं उरुंदी
कितलें गोड नांव तूज़ें देवा रमनाथा
औठार सदांच उरूदी
जीण म्हजी तूज़ेंच सेवेंत सारुंदी
मोगाचे मिलन.....
-जाॅन आगियार
वडाच्या मूळांचो बांघला झोपाळो
झोपाळ्यार तूका घोलयतलों हांव
दोळ्यांत दोळे मेळोवन पळय
मोगाचो खेळ खेळयतलों हांव
सुकणीं झाडाचेर ताल दीतात
गीत तूज़ेंर बरयतलो हांव
मोनो म्हाका समजूं नाका
मोगाचीं उतरां उलयतलों हांव
संवसाराची गाडी हांवें नेटयल्या
तूज्याच वांगडा चलयतलों हांव
हातांत म्हज्या हात मेळय
मोगाचे मिलन फूलयतलों हांव
स्पर्श.....
-जाॅन आगियार
वाऱ्या वांगडा याद तूजी
म्हाका स्पर्श करून गेली
जिणेंत कितलीं सपनां आसलीं
आस मोगाची जिरून गेली
राणी म्हजी करूंक सोदी
राजाक एकटोच दवरून गेली
व्हकल कशी जावन नेटून
दुसऱ्याचोच हात घरून गेली
काळीज सूकलां ,पूराय थकलां
दोळ्यांत दूकां भरून गेली
आयुश्याच्या कांठार उबो
प्रीत म्हजी मरून गेली
John Aguiar was awarded by the Directorate of Art and Culture with "Kala Gaurav award for the year 2023 for his contribution to Literature.
The book by Goa Secondary
Thankful to the study Board and the Editorial Board: Shri Shrikant Palaskar-Co,nvenor, Shri Pramod Uttam Surlakar, Smt. Sucheta Pai, Dr. Prakash Paryenkar, Shri Ashok Sagun Naik, Shri Jack Rodrigues, Smt Trupti Prabhudessai, Smt. manisha Upadhye and Savlo Palyekar.
Editorial Board: Late Nityanand Naik, Dr. Rajay Pawar, Smt. Kashmiri Pawaskar, Smt. Varsha Naik, Shri Sanjay Talwadkar, Shri Minguel Mascarenhas.The cover of the book is designed by Shri Kalanand Kamat Bambolkar. The text book is published by Secretary, Goa SSC & HSSC Board.
POETRY has always been a part of human life. It is an art that lies in the soul and spirit of man since the beginning of time.
*******
Recited my poetry "Fatailye" on Saturday 9 th September at Samrat club International State-1 , "Samrat kavyamahotsav-2023" presided over by none other than Shri Arun Mhatre well known Marathi poet, lyricist, narrator and an activist at the Institute Menezes Braganza, Panjim.
Thanks to the Samrat International and Institute Menezes Braganza coordinator Priya-kalika Bapat and her team.
बापूजीच्या तीन माकडां भशेन....
-जाॅन आगियार
बापूजीच्या तीन माकडां भशेन
जीण जगूंक शिकात
वायट पळोवं नाकात
वायट आयकूं नाकात
वायट उलोवं नाकात
पयलीं भशेन नां आतां
मेजून मापून उलोवपाक शीक
उतरां सांबाळून वापर
कोणाकय लागता वीख
दुस्वास पयस करुन
मोगान काळजां जिकात
बापूजीच्या तीन माकडां भशेन
जीण जगूंक शिकात
वायट पळोवं नाकात
वायट आयकूं नाकात
वायट उलोवं नाकात
बापूजीचीं तीं उतरां
अजून वाचूंक गावतात
धर्म म्हणळ्यार वाटो वेगळ्यो
एकाच जाग्यार पावतात
एकाचाराचो बावटो घेवन
देशाचो मान राखात
बापूजीच्या तीन माकडां भशेन
जीण जगूंक शिकात
वायट पळोवं नाकात
वायट आयकूं नाकात
वायट उलोवं नाकात
