क्रांती.....
जॉन आगियार
अठरावो दीस जूनाचो,
गोंयकारांच्या अभिमानाचो,
गुलामगिरीच्या काळोखांतल्यान
स्वातंत्र्याच्या उजवाडाचो
शेकड्यांनी वर्सां पोर्तुगीज राज,
सोसलो जनतेन सत्तेचो माज,
पूण धैर्य, त्याग आनी संघर्शान,
उठयलों स्वातंत्र्याचो आवाज
हुतात्म्यांच्या रगतान भिजून,
ही पावन जाली माती
तांचो त्याग, बलिदान स्मरणांत धरुन
आमी लायतात तांकां वाती
स्वातंत्र्य सैनिकांचे कश्ट अपार,
तांचो पक्को आसलो निर्धार,
भारत मातेक जोडून गोंय
उघडलें उदरगतीचें दार
आयज गोंय विकासांत फुडें,
शिक्षण, संस्कृती, उद्देगाची नवी मळां,
देशांत उज्वल नांव गोंयचें
लोकांच्या कश्टाची पिकलीं फळां
क्रांती दिसाच्या ह्या सण पर्वाक,
एकवटाचो निर्धार घट्ट करुया,
भेदभाव सगळे विसरून आतां
खोशयेन जीण आमी सारूया
हुतात्म्यांक विनम्र अभिवादन,
स्वातंत्र्य सैनिकांक शतशः वंदन,
गोंय क्रांतीचो संदेश घेवन
फुडें व्हरया प्रगतीचे स्पंदन
