हांव एक कॉकरोच
– जॉन आगियार
हांव एक कॉकरोच
हांव एक सुशिक्षित बेकार,
हातांत घेवन म्हज्या कागदांचो भार,
पूण मेळना खंयच कसलोच आदार.
कोणाक म्हण दितले आमी दोश
आज हांव जालां पाखां
नाशिल्लो फकत एक कॉकरोच.....
सगळे म्हणटात हांव म्हण
म्हज्या देशाचो फुडार,
पूण आज म्हज्याच जिवितान
केला म्हाका सामको बेजार.
आशेच्या भ्रमाक आयल्या खरोंच
आज हांव जालां पाखां
नाशिल्लो फकत एक कॉकरोच.....
सृश्टीची, पर्यावरणाची म्हाका
आसा व्हड चिंता,
पूण समाज म्हज्याच चूलीर
आपली पेज रांन्दता
म्हज्याच नावान भरतात आपलो पाउच
आज हांव जालां पाखां
नाशिल्लो फकत एक कॉकरोच.....
म्हाका म्हजीच वळख
सोदपाची आयज आयल्या वेळ,
नशीबा कडेन चालू आसा
हो कसलो अद्भुत खेळ.
तरनाट्यांकच नडली तुमची ही सोच
आज हांव जालां पाखां
नाशिल्लो फकत एक कॉकरोच.....
पदव्यो आसूनय आयज
हांव जीणेत दारां सोदत उरलों
जाती कातीच्या राजकारणांत
सामको भितर हांव भरलों
म्हज्या जीणेक आयल्या आतां मोच
आज हांव जालां पाखां
नाशिल्लो फकत एक कॉकरोच.....
No comments:
Post a Comment