आमचो राखणदार महान....
--जॉन आगियार
तिसऱ्या दिसा काळोख घटलो, जेजू जिवंत जालो,
मरणाचेर जैत मेळोवन, आपलो उजवाड घालो.
मळबांत उदेली एक नवी स़काळ,
संवसाराक मेळ्ळो सुटकेचो काळ.
फातर पयस जालो, थडगें रिकामी जालें,
भावार्तान संवसाराचें रूप बदलून गेलें.
रगत सांडिल्लें त्या काळख्या दोंगरार,
आशेचीं सुंदर फुलां फुलल्यांत त्या मार्गार .
मार्च-एप्रिलाच्या उज्यांत, रेंवेच्या त्या थारांत,
सगळीं एकठांय आयलीं भावार्थाच्या घरांत.
नूस्त्याची रूच आनी दोशिची गोडसाण,
पास्कांच्या सणाक आयली एक वेगळीच शान.
फेणयेचो घमघम आनी ताल घुमटांचो,
सांबाळ्ळा आमी ठोको आमच्या काळजाचो .
नव्या भेसांत, नव्या उमेदीन गावया एकूच गान:
"जेजू सोमिया जिवंत जालो, आमचो राखणदार महान!"
No comments:
Post a Comment