काळोख आनी काळजाचो आकांत
जॉन आगियार
दोनपारांचो वेळ तो, सूर्यूय लीपलो कूपान
सगळो संवसार बुड्डलो, देवाच्या पुताच्या दुखान
सोव्या वरा सावन, णव्या वरा मेरेन
धर्तरेर आयलो काळोख, देवाच्या निर्णयाच्या रुपान।
पयलीं जसो इजिप्ताचेर, आयिल्लो तो काळोख
तसोच आज सैमान मांडला, अन्याया आड खेळ
प्रवाद्यान सांगिल्लें, तेंच आयलें अणभवाक
भर दोनपारां काळोख आयलो, मेळपाक संवसाराक।
"एलोई, एलोई, लामा साबाक्तानी?"
खुरसा वयल्यान आयली, ती विलापी आनी
"म्हज्या देवा, म्हज्या देवा, कित्याक सोडलें म्हाका?"
स्तोत्र बाविसांतलीं उतरां, जेजून सांगलें ताका
लोक म्हणटात इलीयाक तो, मारता आसूंक जाय साद
पूण जेजूचो तो आसा, बापा कडेन संबाद
हें निराशेचें उतर न्हय, तर जैताचीच निशाणी
सगळें पुराय जालें म्हण, आपलें प्राण दिलें ताणी
No comments:
Post a Comment