शांतादुर्गा नेर्लेकरिणी
जॉन आगियार
जय देवी, जय देवी, शांतादुर्गा माये,
नेर्लेकरिणी माते, काळजांत सदांच राव गे
तुज्या चरणीं हांव उदक ओंपतां,
भावार्थान माये म्हजें मातें तेखयतां
वेरेंच्या धरणीर तुजी ज्योत उजळता,
तुजें पवित्र नांव घेवन, काळीज सुखान भरतां
फुलांच्या हारांनी माते, तुका भक्त सजयतात,
“जय देवी, जय देवी” म्हणत, तुज्या दारात येतात
फांतोडेचेर देवळांत, घंटानाद घुमता,
धूप-दीपाच्या सुवासान, परिसर भरता
कुंकवाच्या रंगांन माये, तुजें रूप फूलता,
तुज्या दर्शनांन जीवाक शांती मेळता
दुःख आयल्यार धांवून , धरतां मायेचो हात,
काळखाच्या वाटेर माते, तूं आमकां धरता वात
नवस घेवन भक्त येतात, आस धरून मनांत,
आप आपलें मागणे हळूच सांगतात कानांत
जय देवी, जय देवी, शांतादुर्गा माये,
नेर्लेकरिणी माते, काळजांत सदांच राव गे
तुज्या चरणीं हांव उदक ओंपतां,
भावार्थान माये म्हजें मातें तेखयतां
घराघरांत तुजी माया, अंगणांत तुजी सावळी,
जाणे ताणें उलो मारलो, थंय थंय तूं पावली
बाळकांच्या हांसण्यांत माते, तुजी माया दिसता,
नेर्लेकरिणी तूं आसल्यार, संसार सुखान भरता
मांडवीच्या ल्हारां सारकी, तुजी माया वांव्हता,
चांदण्यांच्या उजवाडासारकी, तुजी कृपा पडता
संकट येता धीर दिता, दुःख सगळें हरता,
शांतादुर्गा नेर्लेकरिणी, तूं सदांच आमकां राखता
जय देवी, जय देवी, शांतादुर्गा माये,
नेर्लेकरिणी माते, काळजांत सदांच राव गे
तुज्या चरणीं हांव उदक ओंपतां,
भावार्थान माये म्हजें मातें तेखयतां
No comments:
Post a Comment