सात पावलां.....
-जॉन आगियार
तुजे मोने ओंठ पळोवन
उतरां उलोवंक सोदतां हांव
दोळ्यांत तुज्या दोळे घालून
तुकाच पळोवंक सोदतां हांव
तुजें आनी म्हजें काळीज
सासणांक मेळोवंक सोदतां हांव
वोगी उदास तुज्या तोंडार
हांसो खेळोवंक सोदतां हांव
तुज्या खांद्यार हात घालून
लोकांक जळोवंक सोदतां हांव
सात पावलां म्हज्या वांगडा
तुका चलोवंक सोदतां हांव
देश मेळून चलोवया....
जॉन आगियार
फाटिं पळौन चलप्यानो
आतां फूडें पळौवया
पयसावलेली काळजां आमचीं
परत ऐकदां मेळोवया
वाटेवयलीं आडमेळीं काडून
जीण आमची फूलोवया
वाद नाकात बेस्टेच
येयात बसून उलवया
सगळ्या वांगडा हासूया
दूकांय वांगडा गळोवया
जातीभेद,धर्म विसरून
देश मेळून चलोवया
यादी...
-जॉन आगियार
सुस्त न्हिदिल्यो यादी म्हज्यो
परत जाग्यो जावंक लागल्यात
वायट यादी बऱ्यो यादी
मुक्त जावन व्हावूंक लागल्यात
कांय यादी विसरूंक सोदी
भितर म्हाकाच खावंक लागल्यात
उचांबळ जाला जीव म्हजो
मनांतल्यो वांटो धांवूंक लागल्यात
यादींचीं सपनां जावन
पोरणीं गितां गावंक लागल्यात
वादळ जावन यादी आतां
म्हजेंच अस्तित्व धुवूंक लागल्यात
फुलपाक्या...
जॉन आगियार
फुलां वांगडा खेळपा खातीर
फुलपाक्या फुलपाक्या उडत यो
काळजां खोशयेन भरूंक आमचीं
सोबीत रंगांनी तूं बुडत यो
आयुश आसून लेगीत उणे
तुजे कडेन शिकचें जिणें
जीण फुलय उमेदीन भावा
फाल्यांचो दीस पळयला कोणें
बागेंतल्या फुलांक नाचयत
वेगेंत तांकां ओडत यो
फुलां वांगडा खेळपा खातीर
फुलपाक्या फुलपाक्या उडत यो
काळजां खोशयेन भरूंक आमचीं
सोबीत रंगांनी तूं बुडत यो
इतले सोबीत रंग तुजे
सगळींच तुका रावल्यात मेळूंक
फुलां वांगडा भुरगीं लेगीत
आशेन रावल्यात खेळ खेळूंक
रंगबिरंगी तुजीं पाखां हालयत
झाडांतल्यान वाट काडीत यो
फुलां वांगडा खेळपा खातीर
फुलपाक्या फुलपाक्या उडत यो
काळजां खोशयेन भरूंक आमचीं
सोबीत रंगांनी तूं बुडत यो
जय जय स्वामी समर्थ
-जॉन आगियार
जय जय स्वामी समर्थ
तूच म्हजो बापूय - आवय
शेणलां तुजे भक्तीन हांव
तुज्या चरणां मेरेन पावय
तुजोच खरो दास हांव
तुजोच आधार म्हाका
खूब सोंसलां हांवें आतां
आनीक परीक्षा घेवं नाका
तुज्याच हातांनी सायबा म्हाका
मायेचें जेवण तूं जेवय
जय जय स्वामी समर्थ
तूच म्हजो बापूय -आवय
शेणलां तुजे भक्तीन हांव
तुज्या चरणां मेरेन पावय
पावला पावलाक हांव सायबा
तुजेंच ओंठार नांव घेतां
भक्तीन पुराय लीन जावन
तुजींच गायतां गितां
म्हज्या हाता मेरेन देवा
तुज्या धिराचो हात पावय
जय जय स्वामी समर्थ
तूच म्हजो बापूय -आवय
शेणलां तुजे भक्तीन हांव
तुज्या चरणां मेरेन पावय
श्री कठमगळ दादा माहाराज
-जॉन आगियार
श्री कठमगळ दादा माहाराज
तूच वाट दाखय
चूड तुजी हातांत घेवन
उजवाड तूं फांकय
खांद्यांर कामळ घेता
आनी हातांत तुज्या दांडो
आवडता तुका सायबा
रोटाचो गा उंडो
तुज्या मायेचीं फुलां
आमच्या मात्यार रकय
श्री कठमगळ दादा माहाराज
तूच वाट दाखय
चूड तुजी हातांत घेवन
उजवाड तूं फांकय
तूच आमचो राखणो सायबा
तूच आमचो धीर
तुज्या प्रसादाच्या फळाची
आमकां दवर शिर
सुखान जीण सारपाचो
मंत्र आमकां शिकय
श्री कठमगळ दादा माहाराज
तूच वाट दाखय
चूड तुजी हातांत घेवन
उजवाड तूं फांकय
कायचेकाय वागून ....
- जॉन आगियार
गोंयची सोबीतकाय पाड घालपाच्या
नादाक तुमी आतां लागूं नाकात
अशे कायचेकाय वागून
खाल्ल्या पानार हागूं नाकात
गोंय आमची आवय रे
तिचें कापड तुमी सोडयलें
विकली तिका परक्यांक
तिचें हड्डें तुमी माडयलें
आपलेंच अस्तित्व पाड घालून
पोक्या सूखान जगूं नाकात
अशे कायचेकाय वागून
खाल्ल्या पानार हागूं नाकात
दोंगर, झाडां, माड, झरी
ओगीच आमकां मेळूंक नात
गोंयच्या सैमाचेर कवी, लेखक
वयलेवयर भुलूंक नात
जाणट्यांनी राखलें गोंय आमचे
तांचे श्राप भुमी भोगूं नाकात
अशे कायचेकाय वागून
खाल्ल्या पानार हागूं नाकात
अशीं कशीं तुमचीं मनां
सांबाळात आमचीं हीं रानां
गोंयकारांच्या दोळ्यांक तुमी
किद्याक रे बांदतात पानां
आयतें खावपाक मेळटा म्हणून
ओगीच खावन फुगूं नाकात
अशे कायचेकाय वागून
खाल्ल्या पानार हागूं नाकात
दोगरा वयलीं घरां.....
-जॉन आगियार
भुरगेपणार आमी शाळेंत
चित्रकला खूब करताले
पांचवे दोंगर, निळें उदक
रंग आमी भरताले
देखावो काडचो जाल्यार
आमकां विशय ऐकच सुचतालो
व्हांवती न्हंय, व्हडें, माड
आनी दोंगरार सूर्य आसतालो
फुडले पिळगेक आतां
दोगर चित्रांवक कळचें नात
कीर्णा पसरुंक सुर्याक लेगीत
दोंगर फुडें मळचे नात
काण्णां, पिठकोळां, भेडसां, जगमां
आनी खंयच मेळचीनां बोरां
चित्रांचे विशय मात जातले
"दोगरा वयलीं घरां"
जें हातांतल्यान.....
-जॉन आगियार
जें हातांतल्यान सुटून गेलां
ताच्या फाटल्यान किदें वचूं
जें दुख्ख म्हजें न्हीच
तें हांव किद्याक सोसूं
यादीचें गाठोडे म्हजें मोठें
मात्यार घेवन किद्याक नाचूं
कोणय करतात फकांडां म्हजीं
कोणा कोणाचें घेवन बसूं
देवा कृपा कर गा म्हजेर
आनीक कितले नाक घासूं
भियेतां..
इतलीं वर्सां जालीं
योग म्हाका गावूंक ना
आसा तसोच आसां हांव
आत्मनीर्भर जावंक ना
पयलीं आसली आवय म्हजी
हिशोब सगळो घेताली
जितली चावी दिता तितलीच
कूड ही म्हजी चलताली
आवयचो तो जागो
घेतला म्हजें बायलेन
उज्यांतलो जीव म्हजो
पडला आतां कायलेंत
मोबायलाचेर आसत तर
ओगीच म्हाका तिडायता
घरचें किदें काम कर म्हूण
आवाज आपलो वाडयता
सगळे घरचे कायदे तिचे
सामके हांवें पाळूंक जाय
बरें वायट मूड्स हिचे
म्हाका पयलींच कळूंक जाय
आकस्मात फोन करून
विचारतली खंय आसा
वयल्यान कितलोय दाखोवं
पूण भितरल्यान भंय आसा
उतरवयाचे दीस म्हजे
कशे बशेंन जियेतां
जिणेचे घडेर लेगीत
पावला पावलाक भियेतां
-जॉन आगियार
बलिदान
आपलें बलिदान दिवन तांणी
एक नवो इतिहास घालो
मरून लेगीत विरांनी आमच्या
आपलो उगडास अमर केलो
जलियानवाला बागेचो फारपेट
यादी त्यो थंय ताज्यो आसात
भगत सि़गान फांशी घेतली
अजून तांचें नांव घेतात
मातयेच्या वासांतल्यान लेगीत
रगताचे झरे व्हांवताले
चंद्रशेखर आजादान तेन्ना
तरनाट्यांक मारलो उलो
आपलें बलिदान दिवन तांणी
एक नवो इतिहास घालो
मरून लेगीत विरांनी आमच्या
आपलो उगडास अमर केलो
काळजार हात धरून आपल्या
कितल्यो आवयो रडल्यो खंय
भुरगीं रातचीं उपाशीं न्हिदलीं
काळजांनी तांच्या घेवन भंय
रक्तान भरली धर्तरी आमची
मळब लेगीत तामसर जालें
त्या वेळार देश आमचो
असोच किदें जावन गेलो
आपलें बलिदान दिवन तांणी
एक नवो इतिहास घालो
मरून लेगीत विरांनी आमच्या
आपलो उगडास अमर केलो
इंगलेजांक बरेच नाचयले
HRA च्या वांगड्यांनी
काकोरींत रेल्वे लुटली
अशफाक,बिस्मील्ल आनी सांगात्यांनी
परक्यांक गांवूना पूण आपल्याक मारून
आझाद शेवटाक आझादूच रावलो
ह्या तरनाट्या भुरग्यांक लागून
खर्यानीच देशाचो उध्धार जालो
आपलें बलिदान दिवन तांणी
एक नवो इतिहास घालो
मरून लेगीत विरांनी आमच्या
आपलो उगडास अमर केलो
सूखदव, राजगुरू सारक्या विरांक
आमी पुस्तकांतल्यान वळखतात
गांधी, नेहरू, सुभाष, तिळकांचे
पुतळेय हांगा झळकतात
सुटके झुजार्यांनी तेन्ना
एकवटाचो देशाक मंत्र दिलो
परकी राजवटीक विरोध करीत
आयुश्याचो तांचो वांटो गेलो
आपलें बलिदान दिवन तांणी
एक नवो इतिहास घालो
मरून लेगीत विरांनी आमच्या
आपलो उगडास अमर केलो
शेवटाक इंग्लिशांनी देश सोडलो
हांगाचो संबंद तोडलो
बांगेंत फुल्ले फुलां कळे
मळब जालें निळें निळें
निळ्या मळबा पोंदा आमचो
तिरंगो वार्यार हुबलो मेकळो
भारत माता की जय म्हणत
लोकांचो सामको सुटलो ताळो
आपलें बलिदान दिवन तांणी
एक नवो इतिहास घालो
मरून लेगीत विरांनी आमच्या
आपलो उगडास अमर केलो
-जॉन आगियार
श्रावण
श्रावण म्यन्यान म्हाका
नूस्तें खावंक मेळचेंना
कशें दिस वतले म्हजें
म्हाकाच आतां कळचेना
बायलेन सांगलां सारको राव
खंयच कांय खांव नाका
काम कांयच नासतना
जगार बेस्टोच भोंव नाका
शिवराक खावन पोट म्हजें
बेस्टेच वार्यान फूलतलें
संवय नाशिल्यान ह्या जेवणाची
म्हजें चक्र मात्शें हालतलें
नूस्त्या गांतन दाखोवन
पेद्रू बा़दांर म्हाका चाळयतलो
म्हजो निश्चेव कितलो घट्ट
हालोवन तो पळयतलो
किदेंय आसू आतां हांव
श्रावण पूराय पाळतोलोंच
कोठो म्ह्जो नीतळ करून
नव्यान तांजो जातोलोंच
-जॉन आगियार
तूं आमचो उजवाड
दीपगृह तूं आमचो
गणेशा तूं आमचो उजवाड
संवसाराचें कल्याण कर
जिणेंतलो काळोख काड
फळां,फुलां दुर्वा लावन
तुका आमी सजयतात
घुमटां आनी धोल ताशे
तुज्या स्वागताक वाजयतात
बेभान जावन नाचतात देवा
तुज्या मायेचो पावस धाड
दीपगृह तूं आमचो
गणेशा तूं आमचो उजवाड
संवसाराचें कल्याण कर
जिणेंतलो काळोख काड
उमेदीन भरून भक्त आमी
तुजीच गा गायतात गितां
विध्नविनाशक देवा तुका
उमेदीन घरांत घेतां
तुज्याच मायेचें फळ देवा
आमच्याय ताठांत वाड
दीपगृह तूं आमचो
गणेशा तूं आमचो उजवाड
संवसाराचें कल्याण कर
जिणेंतलो काळोख काड
आंग कितलें कांचन काचंन
कान भक्तांचे आयकतात
पिटपिट्टे सुंदर दोळे तुजे
संवसार सगळो नियाळतात
आमचेर येतात वायटां जाल्यार
तूंच ती पयस धाड
दीपगृह तूं आमचो
गणेशा तूं आमचो उजवाड
संवसाराचें कल्याण कर
जिणेंतलो काळोख काड
-जॉन आगियार
गोंयकारांनीच गोंय विकलें
शिकून सवरून बोंडे रे
उमथ्या कळशार उदक रकलें
मुळां पाळां शेणलीं म्हजीं
गोंयकारांनीच गोंय विकलें
अशीच एक पासय मारल्यार
गोंय कशें दिसना...
भासो जाल्यात वेगवेगळ्यो
तकलेंत कांयच वचना
दशा पळोवन गोंया तुजी
म्हजें काळीज लेगीत सुकलें
मुळां पाळां शेणलीं म्हजीं
गोंयकारांनीच गोंय विकलें
घागरो पोल्क घालून तिठ्यार
गोंयकार नुस्तेकारां आसतालीं
आतां भयलीं नुस्तेकारां
गोंयांतूच तुमकां दिसतलीं
गोंयकार पडल्यात कुशीन
आनी भायल्यांक रान मेकळें
मुळां पाळां शेणलीं म्हजीं
गोंयकारांनीच गोंय विकलें
खंय म्हण वच्चें आमी
गोंयकार अशेच कुसतले
सरपंच, आमदार, मंत्री लेगीत
हांगां आतां भायलेच दिसतले
गोंयच्या खातीर मेले झुजारी
गोंयकारा किदें रे शिकलें?
मुळां पाळां शेणलीं म्हजीं
गोंयकारांनीच गोंय विकलें
भाशा, धर्म हे विशय
आमचे आतां प्रधान्य जालां
आमकां झगडत दवरून हांगा
गोंय तांणी केन्नाच व्हेलां
भायल्यांचें वजन जालां चड
आनी आमचें जालां धाकलें
मुळां पाळां शेणलीं म्हजीं
गोंयकारांनीच गोंय विकलें.
-जाॅन आगियार
नाका......
नसायेचो उजो काळजांत
घेवन तूं राव नाका
मोगाचीं फुलां शिंपडायत चल
हातांत तलवरी घेवं नाका
गरीब गरजेवंतांक केन्नाच
दुख्ख तूं दिवं नाका
बेश्टोच कोणाच्या वाटेचो
फातर तूं जावं नाका
हेरांच्या वाट्याचें फळ
जबरदस्तीन खावं नाका
लोकांच्या नदरेंत्यान इतलोय
तूं सकल देंव नाका
तूं पनवत कांय किदें
हें खरेंच म्हाका खबर ना
पूण कोणायचेंय बरें जाता
थंय मात तूं पावं नाका
-जाॅन आगियार
नीत...
मेळत जर फुकट खावपाक
तोणार तुजेंच गायतले गीत
मागीर तुकाच बोटां दाखयतले
तुजेंच ते खावन शीत
कळचें ना केन्ना तुज्या
घाव्यार चोळीत मीठ
मड्याचेर आपली पोळी भाजून
कोणाकय खावपाक दीत
गुन्यांवकारांक माफ करप
आतां संवसाराची जाल्या रीत
पूण जशीं तांचीं कर्मां
वयर तशीच मेळता नीत
-जाॅन आगियार
इष्ट म्हजें...
कोणाचे केंस पीकल्यात
कोणाचे पोले सूकल्यात
सोदतां म्हज्या इश्टांक हांव
आता जीणेंत ते थकल्यात
मेजतालों हांव इष्ट म्हजें
खूब कमी जायत गेल्यात
एक एकल्याक हळूच देवान
आमच्यांतले वयर व्हेल्यात
उल्ल्यात थोडे ईष्ट जरी
पूण तेवूय सामकें तेकल्यात
सोदतां म्हज्या इश्टांक हांव
आता जीणेंत ते थकल्यात
कोणाचे केंस पीकल्यात
कोणाचे पोले सूकल्यात
सोदतां म्हज्या इश्टांक हांव
आता जीणेंत ते थकल्यात
थोडे ईष्ट सांगी म्हाका
तांकां खेळा शिवाय जायना
हालीं तेंपार सापळो जाल्यात
तांच्या हाडानीं लेगीत कांय ना
काय जाणानी पळयल्ली सपना....
थंयच्यो वाटोच ते चूकल्यात
सोदतां म्हज्या इश्टांक हांव
आता जीणेंत ते थकल्यात
कोणाचे केंस पीकल्यात
कोणाचे पोले सूकल्यात
सोदतां म्हज्या इश्टांक हांव
आता जीणेंत ते थकल्यात
जे प्रेम गितां बरयताले
आतां मेडीकल फोर्मां बरयतात
तरनाट्या पणाची मस्ती आतां
ह्या पीरायेचेर ते जीरयतात
थोड्याची नदर गेल्या जाल्यार
कोणाच्यो दीमयो दूकल्यात
सोदतां म्हज्या इश्टांक हांव
आता जीणेंत ते थकल्यात
कोणाचे केंस पीकल्यात
कोणाचे पोले सूकल्यात
सोदतां म्हज्या इश्टांक हांव
आता जीणेंत ते थकल्यात
कालिज म्हजेय पीटपीट्टालें
आज ताजेंय तेंच जालां
ब्लोक्स जावन तीन कडें
तेंवूय सामकें थंड जालां
रक्त दाबान कळजा ठोके
म्हजें खंय चूकल्यात
सोदतां म्हज्या इश्टांक हांव
आता जीणेंत ते थकल्यात
कोणाचे केंस पीकल्यात
कोणाचे पोले सूकल्यात
सोदतां म्हज्या इश्टांक हांव
आता जीणेंत ते थकल्यात
-जाॅन आगियार
मेळूंक आयलां...
- जाॅन आगियार
पोर्सींतलीं फुलां गूंतून...
तुज्या माथ्यांत माळूंक आयलां
फातयेंचें निमीत्त आसूं...
खऱ्यांनीच तुका मेळूंक आयलां
तुज्या हातांत हात घालून...
प्रणय खेळ खेळूंक आयलां
पावस कितलोय पडूं आतां...
मोगा उज्यान जळूंक आयलां
फुटील्या नळ्या पावळेवरीं..
तुज्या आंगार गळूंक आयलां
खऱ्यांनीच सांगता मनांतल्यान...
आज तुकाच हांव मेळूंक आयलां
तिरशे नदरेन....
- जाॅन आगियार
अशें तूं तिरशे नदरेन
म्हाका परत पळोवं नाका
खेळणें समजून खेयळें तूं
आनीक म्हाका खेळोवं नाका
उदास करून तोंड तुजें
मानग्याचीं दुकां गळोवं नाका
कोळशांचेर जळत आयलां हांव
आनीक काळीज जळोवं नाका
आमकां दोगांयकूय देवा
कशेंच फुडें मेळोवं नाका
तुटल्यात ते धागे मोगाचे
परत एकदां जूळोवं नाका
आमच्यो वाटो वेगळ्यो जाल्यात
गणीत परत हालोवं नाका
पापा
- जाॅन आगियार
पयस वचून लेगीत पापा
तूं म्हज्याच काळजांत रावता
अजून म्हाका सावरत सांबाळीत
म्हज्याच वांगडा भोंवता
पाळणें बांदूंन आंब्या खांद्यार
तुवें म्हाका धोलयलो
घोडो जावन तुवें तुजे
फाटीर म्हाका खेळयलो
नातें बांदलां तुजें म्हजें
मोगाच्या घट्ट दोरांनी
तुजोच हांव, तुजेंच रगत
व्हांवता म्हज्या शिरांनी
बरें संस्कार घालून पापा
तुवें म्हाका वाडयलो
धीट मन जावचे खातीर
काणयो सांगून घडयलो
हांव दिल्ली कामाक वतना
दुकांनी रे तूं रडलो
दिल्ली पावता म्हणल्यार कळ्ळें
म्हज्या आदाराचो खांबो मोडलो
आज सगळें आसून लेगीत
तुजोच उणाव रे भासता
दोळे घट्ट धांपल्यार लेगीत
पापा तूंच म्हाका दिसता
देवी म्हाळशे म्हजी तूं मांय
- जाॅन आगियार
तुजें म्हजें नातें गे जुळलां
देवी म्हाळशे म्हजी तूं मांय
इतली दयाळू आनी गोड
मायेची आनी करुणेची बांय
काळखांत अडलां वाट दाखय
तुजे शक्तीचो उजवाड फांकय
घावे आमचे तूं मायेन पेकय
कश्टांचेर आमच्या अमृत रकय
तकली दवरूंक दी गे पांय
देवी म्हाळशे म्हजी तूं मांय
तुजें म्हजें नातें गे जुळलां
देवी म्हाळशे म्हजी तूं मांय
इतली दयाळू आनी गोड
मायेची आनी करुणेची बांय
जेन्ना जेन्ना गरज पडली
सृष्टी तुवें गे वाटायली
दैताक मारुन उडोवन तुवें
शांतीची ज्योती माये पेटयली
तुज्या शिवाय नाका गे कांय
देवी म्हाळशे म्हजी तूं मांय
तुजें म्हजें नातें गे जुळलां
देवी म्हाळशे म्हजी तूं मांय
इतली दयाळू आनी गोड
मायेची आनी करुणेची बांय
फुलकार समाज भक्ती भावान
जायां कळ्यांनी तुका न्हेसयतात
उत्सव मोठो भक्तगण मेळून
रथांत तुका माये बसयतात
भक्तीन जीण जाता दांय
देवी म्हाळशे म्हजी तूं मांय
तुजें म्हजें नातें गे जुळलां
देवी म्हाळशे म्हजी तूं मांय
इतली दयाळू आनी गोड
मायेची आनी करुणेची बांय
आवय...
--जाॅन आगियार
आज म्हज्यांत तुजीं पाखां नात
तरी म्हाका उडन दिसता
हाताच्या बोठाक धरून तुज्या
चार पावलां चलन दिसता
पासय मारचे खातीर म्हाका
तुज्या हांडीर चडन दिसता
थकतां हांव आवय तेन्ना
तुजे मांडयेर पडन दिसता
तुजे साडयेचो पदर धरून
अशेंच म्हाका रडन दिसता
भीलां....
--जाॅन आगियार
आज काल हासप
लेगीत नकली जालां
कूड जाल्या बावलेवरी
जीणेचे अस्तीत्वच मेलां
नात्यांक लेगीत लागल्या किड
आपलेपण पयस गेलां
थरथरपी उतरां म्हजीं
म्हज्या म्हाकाच हांव भीलां
दयना..
--जाॅन आगियार
साप थकलां, खर्शेला
आतां फुडें सरुंक जायना
जिणेंत सगळें मेळ्ळां म्हाका
पूण हातांत मात कांय ना
दुयेंत खाटीर पडल्यार लेगीत
म्हाका कोणुच हात लायना
नातीं कूटूंब आसून लेगीत
आतां हिच म्हजी दयना
सगळे पट्टात म्हूण
--जाॅन आगियार
सगळे पट्टात म्हूण
हांवूय पडलों मोगान
तुज्या म्हर्यांत गेल्यार
तांबडें जालें रागान
गेलो फिलीपाल्या बार्रांत
किदें जाता दोन पेगान?
जिणेचें चक्र मात
घुंवत गेलें वेगान
मोगा पाकळ्यो झडल्यो
आमी वेगवेगळ्या जगान
जीण म्हाका खेळयता...
--जाॅन आगियार
म्हजेच वांगडा पावलां मारता
जीण म्हजेच लागीं उलयता
न्हिदेंत गाड आसत जाल्यार
हळूच म्हाका हालयता
म्हजेच यादींचो झोपाळो करून
केन्नाय म्हाका धोलयता
उदास आसत जाल्यार हांव
मनोबल म्हजें ती फुलयता
विसरून गेल्लो अस्तित्व म्हजें
जीण म्हाका खेळयता
म्हजेच वांगडा पावलां मारता
जीण म्हजेच लागीं उलयता
कॉलेजींतले ते दीस....
--जाॅन आगियार
एक नदर पुस्तकांतल्या नोट्सांचेर
आनी दुसरी तुजेर दवरप
हळूच तुजो हांसो म्हज्या
दोळ्यांच्या कॅमेरांत कैद करप
मोगाचें आसलें कळे म्हज्यांत
फुडें आनीक फुलचें नांत
कॉलेजींतले ते दीस म्हजे
जिणेंत परत मेळचे नात.
तूं जंय वेता थंय
हळूच तुजो फाटलाग करप
तुज्या गालाक पडपी खळयेचेर
एक नवी कविता रचप
मोगाचे किडे काळजांत म्हज्या
आनीक कशेच खेळ्चे नात
कॉलेजींतले ते दीस म्हजे
जिणेत परत मेळचे नात.
चोरयां तुका पोळोवपाची मजा
परत आतां गावची ना
कॉलेज बस सुटली
परत आतां रावची ना
मोगाक लागून गळयलीं दुकां
म्हजे त्रास कळचें नात
कॉलेजींतले ते दीस म्हजे
जिणेंत परत मेळचे नात.
जेजू तूज्या पायांकडे
जाॅन आगियार
जेजू तूज्या पायांकडे
येवाचें दिसता घावन
तूज्याच भक्तीन हांव
आज बरयतां हें कवन
रीगयले तूवें काळजानीं
घडे बरे गूणांचे
आमच्या खातीर माडयले
तूवें कांटे जिणेचे
तूजेच वरवीं जालां म्हजें
जिणें आतां पावन
जेजू तूज्या पायांकडे
येवाचें दिसता घावन
तूज्याच भक्तीन हांव
आज बरयतां हें कवन
अस्तित्व ..
जाॅन आगियार
म्हजो हांवूच आसां अजून
संवय म्हजी सुटना
नवे चेहरे लावून म्हजेर
हांव सकाळचो उठना
नकल कोणाक करिना
फटींगपणां म्हाका पटना
कितल्योय काडी मारुन उडयात
उजो म्हाका पेटना
मुळां म्हजीं घट्ट आसात
अस्तित्व म्हजें मिटना
सूत जुळना.....
जाॅन आगियार
तुजे म्हज्या प्रितीचे सूत जुळना
खंय किदें बिगडलां कांयच कळना
तूंच म्हजो उजवाड आसलो
जीणें कशें व्हरचे फुडें
एकसूरपणान जागतां हांव
काळोख सगळे कडेन
जीण सारकीच घुस्पल्या वाटच मेळना
तुजे म्हज्या प्रगतीचें सूत जूळना
खंय किदें बिगडलां कांयच कळना
म्हजी नदर तुजे नदरेक
कशीच किद्याक लागली ना
ताळो सुकून सुकला म्हजो
मोगाची तान बागली ना
प्रितीचो रोप बावला, फुलांच फुलना
तुजे म्हज्या प्रगतीचें सूत जूळना
खंय किदें बिगडलां कांयच कळना
आवय..
जाॅन आगियार
अजून ऐकटो आसता तेन्ना
म्हाका तुजी याद येता
काळोख जाता तेन्ना यादींनी
पेत्रोलाचो दिवो पेट्टा
न्हीद येता तेन्ना आवय
तुजी मांडी याद येता
भूक लागता तेन्ना तुज्या
हाताची उंडी याद येता
जोर येता तेन्ना कपलाक
घडी घालप याद जाता
जिणे विशीं तुजे धडे
अजून म्हाका याद आसा
तुजेच यादीन जगतां जीण
कशें फारीक करचें रीण
आपलेंच पांगरूण घालून
तुवें म्हाका न्हिदयलो
आपल्या पोटाक मारून
तुवें म्हाका वाडयलो
तुज्या मायेच्या सूखान आवय
म्हाका तुवें घडयलो
तुज्या खातीर....
-जाॅन आगियार
तुज्या खातीर एक कवन
बरोवचें आसा म्हाका
पोरणें मोगा गीत आज
झरवचें आसा म्हाका
मोगाचे घोंट हांव
हळू हळू पित रावलों
पचून वचूना ते आज
जिरोवचें आसा म्हाका
तुज्या खातीर एक कवन
बरोवचें आसा म्हाका
पोरणें मोगा गीत आज
झरोवचें आसा म्हाका
तूंवय म्हजेर मरतालें
हें खबर लेगीत नासलें
हातांत हात धरून आतां
मिरोवचें आसा म्हाका.
तुज्या खातीर एक कवन
बरोवचें आसा म्हाका
पोरणें मोगा गीत आज
झरोवचें आसा म्हाका
