महालक्ष्मी माता

-जाॅन आगियार

जय जय महालक्ष्मी तुं समृद्धीची देवी

तुजीच भक्ती माये आमच्या जीणेची चावी

साळकांतले देवी तुं हात आमचो धर

दुख्खाचो दोंगर माये तुंच पयस कर

तुजे चरणी आयलां कर मायेचो शिंवर

कृपा दृश्टी तुजी सदांच भक्तांचेर दवर

तुज्या दर्शनान  आमची नदर जाता जिवी

जय जय महालक्ष्मी तुं समृद्धीची देवी

तुजीच भक्ती माये आमच्या जीणेची चावी

वैभवाची देवी तुं धनाची गे दाती

घनाक्षरी माते तु वैभव प्रदाती

आमच्या काळजानी माये सदाच वास कर

भाग्य विदाता खरी तु मायेची झर

तुज्या पासुनच मेळता भक्तांक स्फुर्त नवी

जय जय महालक्ष्मी तुं समृद्धीची देवी

तुजीच भक्ती माये आमच्या जीणेची चावी