मरण
-जॉन आगियार
म्हजें मरण आज तूं थरय
आतां म्हाका हीं जीण नाका
आज हांव थकलां जिणेंत
मरणाची न्हीद दी म्हाका
मोगा-दारां बंद जाल्यांत
आशा सुटल्या मेकळ्या वाऱ्यार
सर भोंवतणी काळोख जाला
सावळी पासून म्हजी ना दारार
एक दुख्ख आसा तेंच म्हजें दीसता
देखून म्हजें मरण आज तूं थरय
बैलांची जोडी
-जॉन आगियार
हातांत म्हज्या बडी
काय बरी ओडटा गाडी
म्हज्या बैलांची जोडी ।। २।।
हीरर हीरर हीरर
दिसभर आमी काम केलें
सामान हेवटेंन तेवटेंन व्हेलें
बैलांक म्हज्या कामाची गोडी
काय बरी ओडटा गाडी
म्हज्या बैलांची जोडी ।। २।।
हीरर हीरर हीरर
गाडयेक म्हजें दिता रे ताल
बैलांच्या गळ्यांतली घागऱ्यांची माळ
थाटाची न्हंय आमची जीण सादी
काय बरी ओडटा गाडी
म्हज्या बैलांची जोडी ।। २।।
हीरर हीरर हीरर
बैलांक खावड घालूंक जाय
कष्टांचें फळ तांका मेळूंक जाय
न्हाणोवंक तांकां गांवांची खाडी
काय बरी ओडटा गाडी
म्हज्या बैलांची जोडी ।। २।।
हीरर हीरर हीरर
जीण
-जॉन आगियार
जीण दुखाचो दर्या
जीण कीर्णाचो सुर्या
जीण म्हळ्या एक भास
जीण तुटील्या मनाची आस
जीण म्हळ्यार एक व्हडें
जीण म्हळ्यार कुवाडें
जीण देवाचें गुपीत
जीण एक कवीत
जीण संवसाराची रीत
जीण म्हळ्यार एक प्रीत
जीण मधुर संगीत
गीत गायत यो...
-जॉन आगियार
कसलेंय संकट येंव दी धीट जायत यो
वाट अनोळखी आसत तर तूं गीत गायत यो
जिविताचो खेळ, संवसाराचो मेळ
बरें जावपाक केन्नाय लागता वेळ
संवसारांचे झटके मातशे खायत यो
घडचें आसा घडटलें, घट्ट जायत यो
कसलेंय संकट येंव दी धीट जायत यो
वाट अनोळखी आसत तर तूं गीत गायत यो
पावलां सारकीं मार जिणेत सकयल पडनाका
पडलो जाल्यारय उट बेगीन ओगीच रडनाका
वाटेच्या घायांक तूं वखद लायत यो
काळीखी जर वाट जाल्यार वात लायत यो
कसलेंय संकट येंव दी धीट जायत यो
वाट अनोळखी आसत तर तूं गीत गायत यो
ल्हवूच.....
-जॉन आगियार
काळजांत भितर येवन वच
मोगाची खुणा दिवन वच
मोग किदें तें म्हाका
ल्हवूच कानांत सांगून वच
सपनांत म्हज्या येवन तूं
म्हाका मात्शें मेळून वच
मोगाचो हो खेळ पोरणों
म्हजें वांगडा खेळून वच
मोग किदें तें म्हाका
ल्हवूच कानांत सांगून वच
मोग म्हाका भिजोवन गेला
तूंय मोगांन भीजून वच
पदर तुजो तोंडार धरून
अशेच म्हाका लजून वच
मोग किदें तें म्हाका
ल्हवूच कानांत सांगून वच
फुलां पळय फुल्यांत बागेंत
धांवत यो गों म्हजें वेंगेंत
म्हजे कुशीक बसून तूं
दोळ्यांत दोळे मेळोवन वच
मोग किदें तें म्हाका
ल्हवूच कानांत सांगून वच
फटयलें....
-जॉन आगियार
तूवें म्हाका उतर दिलें
हांवें तूका काळीज दिलें
काळजाक तूवें सतयलें
अशें कित्याक फटयलें रे
अशें कित्याक फटयलें
काळजाक म्हज्या उजो लागला
सोंसत रावलें हांव
जिबेर उतर हाडलें ना
जळत रावलें हांव
मोगा खेळ खबर नासलो
तुवें खेळूंक शिकयलें
अशें कित्याक फटयलें रे
अशें कित्याक फटयलें
कित्याक तुवें केलें अशें
गावांत जालां हाशें
लोक म्हाका म्हणता पीशें
म्हाका समजून घेवना रे
सामकें तुवें विटयलें
अशें कित्याक फटयलें रे
अशें कित्याक फटयलें
मिलन कशें घडलें नां ?
काळीज कशें जूळ्ळें ना ?
मोगाक खेळ समजलो रे
उतर तुवें पाळ्ळें ना
शांत आसलें मन हें म्हजें
तुवें कित्याक खवदळ्ळें
अशें कित्याक फटयलें रे
अशें कित्याक फटयलें
