गोंयचो सायब आमचो राखणदार खरो...
जॉन आगियार
गोंयच्या मात्येंत तुजी आसा सावळी,
भावार्तान ओंपतात तुका मेणाची बावली.
जेजूचो संदेश तूवें संवसाराक शिपडायलो,
विसव घेवंक आमचो गांव आपणायलो.
गोंयच्या मात्यावयलो तूंच गा तूरो
गोंयचो सायब तुं, आमचो राखणदार खरो...|| २ ||
दर्याचें वारें आनी ल्हारांचो तो गाज,
तुज्या हातांतल्या खुर्साक मेळ्ळी देवाची साज.
पयस जाता दुख्ख आनी संकश्टाचें वारें,
तुज्या एका आशिर्वादान सगळें जाता बरें.
तूं सायबा आमचो, मायेचो निर्मळ झरो,
गोंयचो सायब तुं, आमचो राखणदार खरो...|| २ ||
बाझिलिकेच्या कोशांन विसावला तुं थंय,
भक्तांच्या मनांत ना कसलोच भंय.
शेंकड्यांनी वर्सां तुजी कूड गोंय राखता,
आमच्या सुखा खातीर तू देवा लागीं मागता.
तूज़े विणे कांयच नाका तूंच आमकां पूरो
गोंयचो सायब तुं, आमचो राखणदार खरो...|| २ ||
भक्तांच्या उल्याक तू सदांच येता धांवून,
सगळें गोंय गायता तुज्या गिताची धून.
आशीर्वादान तुज्या, गोंय जालां सुखी निवास,,
तूं आमचो राखणो आनी आमी तूज़े दास
व्हडले गोंयांतल्यान सुटला भक्तीचो वारो,
गोंयचो सायब तुं, आमचो राखणदार खरो...|| २ ||
