तुका किदें जाता?
-जॉन आगियार
जग हें फक्त मनशांचें
हे कोणे सांगलें पुता....
मोनजाती मुक्त जगल्यार
तुका किदें जाता?
एक बिस्कीट दिल्यार
सुणें
सदांच मोगान वागता
मनीस जात बेईमान
खाल्या पानार हागता
मोनेजातीक मोग दी
ओगीच किद्याक भिता?
जग हें फक्त मनशांचें
हे कोणे सांगलें पुता....
मोनजाती मुक्त जगल्यार
तुका किदें जाता?
तुमी घरांत न्हिदतात तेन्ना
तीं रात जागयतात
चोरी करुंक येतल्यांक
परती वाट दाखयतात
मायेन वागोवन पळय तांकां
दुख किद्याक दिता?
जग हें फक्त मनशांचें
हे कोणे सांगलें पुता....
मोनजाती मुक्त जगल्यार
तुका किदें जाता?
ताचेर फातर मारत जाल्यार
तीं मुक्त कशीं भोवतली?
तुमीच मनां कोडू केल्यार
तीं वगी कशीं रावतलीं?
मोगाक मोग दितात तीं
पूण मार सोंसूं येता?
जग हें फक्त मनशांचें
हे कोणे सांगलें पुता....
मोनजाती मुक्त जगल्यार
तुका किदें जाता?
ऐखाद्यो कांय वायट गजालीं
घडये जाल्ल्यो आसत
तांचेर सारकी चौकशी
जाल्याय बी नासता
एकट्या मनशान अपराध केल्यार
कोर्ट सगळ्यांक सजा दिता?
जग हें फक्त मनशांचें
हे कोणे सांगलें पुता....
मोनजाती मुक्त जगल्यार
तुका किदें जाता?
सुण्यान चावे घेतलें म्हण
पयर बातम्यो आयल्यो दोन
सुण्याची बाजु किदें ती
आतां मांडटलो कोण
कोणेय किदेंय दिल्यार
तीं भुकेन बाबडीं खाता
जग हें फक्त मनशांचें
हे कोणे सांगलें पुता....
मोनजाती मुक्त जगल्यार
तुका किदें जाता?
गितेची उतरां लक्षांत आसूं
मांडू नाकात खेळ
जितलें वायट कर्म तुमचे
तशीच वायट येतली वेळ
सर भोंवतणी सुण्यांक
खंय
घेवन बसता "दत्ता".
जग हें फक्त मनशांचें
हे कोणे सांगलें पुता....
मोनजाती मुक्त जगल्यार
तुका किदें जाता?
