थेंब्या थेंब्यानी....
-जाँन आगियार
थेंब्या थेंब्यानी पावस पडटा
पावस पावस खेळया आमी...।। २।।
पावसान सगळें वलें केलां
सैम पांचवें चार जालां
वावझड मारून म्हज्या मनांत
भुरगेपण जिवें जालां
इश्टांक वांगडा घेवन
वले मातयेंत लोळया आमी
थेंब्या थेंब्यानी पावस पडटा
पावस पावस खेळया आमी...।। २।।
जेन्ना जेन्ना पावस येता
वारें मदुर संगीत दिता
नकळत म्हजें मन आतां
यादीनी उचांबळ जाता
कागदाचीं व्हडीं घेवन
पावसा उदकांत खेळया आमी
थेंब्या थेंब्यानी पावस पडटा
पावस पावस खेळया आमी...।। २।।
पावसान थेंब्या पोंदा अशेच
एक खीण रावन दिसता
भुरगेपण म्हजें आज
म्हजे वांगडा नाचता
बेब्यां वांगडा उमेदीन
उदकांत उडयो मारया आमी
थेंब्या थेंब्यानी पावस पडटा
पावस पावस खेळया आमी...।। २।।
