राखणदार जेजू

 राखणदार जेजू 

जॉन आगियार

संकटातल्यान मका तूं सांभाळता,

दुःख म्हजेर येता तेन्ना लागीं तूं घेता,

म्हजो राखणदार जेजू, म्हजो तारणहार,

राखणदार जेजू, म्हजो राखणदार…

वाट घूस्पता तेन्ना तू धावून येता,

मरणाच्या वाटेर  जीवीत फूलयता,

पडलो जरी हांव, म्हाका तुजोच आघार

राखणदार जेजू, म्हजो राखणदार…

जेन्ना काळजी मनांत सरता,

म्हाका येशू येऊन धीर दीता 

बिघडलेले काम करता तो पार,

राखणदार जेजू, म्हजो राखणदार…

तो धर्तरेचो राजा, तो सर्गाचो सरकार,

आमचो  मसीहा, ताचो मोगाचो दरबार,

दीन-दुबळ्यांचो तो एक आधार,

राखणदार जेजू, म्हजो राखणदार…

म्हज्या गळ्याक तो गीत दीता,

म्हज्या नदरेक नवो उजवाड दीता,

दुःखांन आशिल्याक, उघडता दार

राखणदार जेजू, म्हजो राखणदार…

तो मोग शिपडायता, ताची माया अपार,

ताच्या पांयांकडें मेळता जीवाक आधार,

आमच्या दूखांचो तूंच घेता भार

राखणदार जेजू, म्हजो राखणदार…

तूं असत तर सांगाताक..

तूं असत तर सांगाताक..

जॉन आगियार

तू आसत तर सांगाताक,

मनाक धीर मेळतलो,

तुज्या मोगाच्या सावळेंत

जीणेचो कळो फूलतलो

तू चलत तर‌ सांगाताक,

दुःखां सगळी पळतली,

बावील्या या मनाक म्हज्या

परत पाखां मेळतली

तुजो एक हासो म्हळ्यार

सुखाची भूक भागयता,

आनी सहवास तूजो म्हजी

जगपाची उमेद जागयता

तूं लागीं आसता तेन्ना,

कसलोच भंय नासता

तू आसतना सांगाताक ,

जीण सुंदर भासता

वादळ कितलेंय येंवदी,

हात तुजो हातात राऊं,

काळखी वाटेर‌ चलतना

तूंच म्हजो दिवो जाऊं

थकलेल्या या पावलांक

तुजोच आधार मेळचो,

हूवारान शेणलेल्या  सपनांक

परतीचो  रस्तो कळचो