गोंयकारांनीच गोंय विकलें
शिकून सवरून बोंडे कशे
उमथ्या कळशार उदक रकलें
मुळां पाळां शेणलीं म्हजीं
गोंयकारांनीच गोंय विकलें
अशीच एक पासय मारल्यार
गोंय कशें दिसना...
भासो जाल्यात वेगवेगळ्यो
तकलेंत कांयच वचना
दशा पळोवन गोंया तुजी
म्हजें काळीज समकें दूकलें
मुळां पाळां शेणलीं म्हजीं
गोंयकारांनीच गोंय विकलें
घागरो पोल्क घालून तिठ्यार
गोंयकार नुस्तेकारां आसतालीं
आतां भयलीं नुस्तेकारां
गोंयांतूच तुमकां दिसतलीं
गोंयकार पडल्यात कुशीन
आनी भायल्यांक रान मेकळें
मुळां पाळां शेणलीं म्हजीं
गोंयकारांनीच गोंय विकलें
आमचे ते उंडेय गेले
आनी ते पोदूरय गेले
गोंयच्या बारबेरीनी लेगित आतां
जाल्यात भायलेच म्हाले
दोंगर पोखरले,जामनी गेल्यो
बांयचें उदक लेगीत सूखलें
मुळां पाळां शेणलीं म्हजीं
गोंयकारांनीच गोंय विकलें
खंय म्हण वच्चें आमी
गोंयकार कितलें सोसतले
सरपंच, आमदार, मंत्री लेगीत
हांगां आतां भायलेच दिसतले
सूटके झुजार्यानी आमच्या
गोंय कोणा खातीर राखले?
मुळां पाळां शेणलीं म्हजीं
गोंयकारांनीच गोंय विकलें
भाशा, धर्म हे विशय
आमचे आतां प्रधान्य जालां
आमकां झगडत दवरून हांगा
गोंय तांणी केन्नाच व्हेलां
भायल्यांचें वजन जालां चड
आनी आमचें जालां धाकलें
मुळां पाळां शेणलीं म्हजीं
गोंयकारांनीच गोंय विकलें.
-जाॅन आगियार
No comments:
Post a Comment