पयलीं तेंपार....

पयलीं तेंपार.... जॉन आगियार पयलीं तेंपार अशें नासलें मेळून सगळे रावताले जात धर्म विसरून सगळे एका मेकाक पावताले आतां कितलोय चल्ल्यार फुडेंच पावना उठून सुठून मात दुखवतात भावना असो कसो जातलो विकास एकचाराचेर मारल्यार पिकास उजू वाटेन चलना जाल्यार खंयच्या खंय पावतले पयलीं तेंपार अशें नासलें मेळून सगळे रावताले जात धर्म विसरून सगळे एका मेकाक पावताले. एका मेकाचेर मारून शिंगा तकलेर घेवन भोंवतात धोंगां शांतीकाय गेली खंय?? किदें रे चल्लां हांगा वंयच शेत खाता जाल्यार कोणाक धरूंक धांवतले?? पयलीं तेंपार अशें नासलें मेळून सगळे रावताले जात धर्म विसरून सगळे एका मेकाक पावताले खरें उलोवपाक भंय दिसता मेजून मापून उलोवचें पडटा आपलेच दांत आपलेच ओंठ जोर हो पेजेक रट्टा पुलिशेंतल्यान सोडोवपाक आमकां कोण मनीस गावतले पयलीं तेंपार अशें नासलें मेळून सगळे रावताले जात धर्म विसरून सगळे एका मेकाक पावताले पुराणांतलीं वायंगीं खंय शाकेक वापरून खायनात कसल्याय बारीक कारणां वयल्यान बेश्ठेच दुस्मान जायनात धर्माच्या नांवान कित्याक एका मेकाक मारतले पयलीं तेंपार अशें नासलें मेळून सगळे रावताले जात धर्म विसरून सगळे एका मेकाक पावताले फाटीं पळयत रावल्यार आमी फुडें कशें सरतले उदरगतीच्या मळार आमी नेट कशे घरतले?? कळसूत्री बावल्या बशेन बोठार नाच करतले? पयलीं तेंपार अशें नासलें मेळून सगळे रावताले जात धर्म विसरून सगळे एका मेकाक पावताले देव आमकां हांगाच्यान केन्ना व्हरता कळचें ना जाती, धर्म, धन, दौलत थंय व्हरपाक मेळचें ना सुकून सांपळो जाल्यात कपडे कमरा सकयल देंवतले पयलीं तेंपार अशें नासलें मेळून सगळे रावताले जात धर्म विसरून सगळे एका मेकाक पावताले

थाव...

थाव...

--जाॅन आगियार

जिणेचो थाव कळपा खातीर

केन्नाय पडप गरजेचें

तेंगशी गाटपा खातीर उठून 

दोंगर चडप गरजेचें

फुडें पावलां मारता मारता

आपूण घडप गरजेचें

मन हलकें करपा खातीर

मेकळेपणान रडप गरजेचें

सात पावलां.....

 सात पावलां.....

-जॉन आगियार 

तुजे मोने ओंठ पळोवन

उतरां उलोवंक सोदतां हांव

दोळ्यांत तुज्या दोळे घालून

तुकाच पळोवंक सोदतां हांव

तुजें आनी म्हजें काळीज

सासणांक मेळोवंक सोदतां हांव

वोगी उदास तुज्या तोंडार

हांसो खेळोवंक सोदतां हांव

तुज्या खांद्यार हात घालून

लोकांक जळोवंक सोदतां हांव

सात पावलां म्हज्या वांगडा

तुका चलोवंक सोदतां हांव

देश मेळून चलोवया....

 देश मेळून चलोवया....

जॉन आगियार

फाटिं पळौन चलप्यानो

आतां फूडें पळौवया

पयसावलेली काळजां आमचीं

परत ऐकदां मेळोवया

वाटेवयलीं आडमेळीं काडून

जीण आमची फूलोवया

वाद नाकात बेस्टेच

येयात बसून उलवया

सगळ्या वांगडा हासूया

दूकांय वांगडा गळोवया

जातीभेद,धर्म विसरून

देश मेळून चलोवया

यादी...

 यादी...

-जॉन आगियार 

सुस्त न्हिदिल्यो यादी म्हज्यो

परत जाग्यो जावंक लागल्यात

वायट यादी बऱ्यो यादी

मुक्त जावन व्हावूंक लागल्यात

कांय यादी विसरूंक सोदी

भितर म्हाकाच खावंक लागल्यात

उचांबळ जाला जीव म्हजो

मनांतल्यो वांटो धांवूंक लागल्यात

यादींचीं सपनां जावन

पोरणीं गितां गावंक लागल्यात

वादळ जावन यादी आतां

म्हजेंच अस्तित्व धुवूंक लागल्यात

फुलपाक्या...

 फुलपाक्या...

जॉन आगियार

फुलां वांगडा खेळपा खातीर 

फुलपाक्या फुलपाक्या उडत यो

काळजां खोशयेन भरूंक आमचीं

सोबीत रंगांनी तूं बुडत यो

आयुश आसून लेगीत उणे

तुजे कडेन शिकचें जिणें

जीण फुलय उमेदीन भावा

फाल्यांचो दीस पळयला कोणें

बागेंतल्या फुलांक नाचयत

वेगेंत तांकां ओडत यो

फुलां वांगडा खेळपा खातीर

फुलपाक्या फुलपाक्या उडत यो

काळजां खोशयेन भरूंक आमचीं

सोबीत रंगांनी तूं बुडत यो

इतले सोबीत रंग तुजे

सगळींच तुका रावल्यात मेळूंक 

फुलां वांगडा भुरगीं लेगीत

आशेन रावल्यात खेळ खेळूंक

रंगबिरंगी तुजीं पाखां हालयत 

झाडांतल्यान वाट काडीत यो

फुलां वांगडा खेळपा खातीर

फुलपाक्या फुलपाक्या उडत यो

काळजां खोशयेन भरूंक आमचीं

सोबीत रंगांनी तूं बुडत यो

जय जय स्वामी समर्थ

 जय जय स्वामी समर्थ

-जॉन आगियार

जय जय स्वामी समर्थ

तूच म्हजो बापूय - आवय

शेणलां तुजे भक्तीन हांव

तुज्या चरणां मेरेन पावय

तुजोच खरो दास हांव

तुजोच आधार म्हाका

खूब सोंसलां हांवें आतां

आनीक परीक्षा घेवं नाका

तुज्याच हातांनी सायबा म्हाका

मायेचें जेवण तूं जेवय

जय जय स्वामी समर्थ

तूच म्हजो बापूय -आवय

शेणलां तुजे भक्तीन हांव

तुज्या चरणां मेरेन पावय

पावला पावलाक हांव सायबा

तुजेंच ओंठार नांव घेतां

भक्तीन पुराय लीन जावन

तुजींच गायतां गितां

म्हज्या हाता मेरेन देवा

तुज्या धिराचो हात पावय

 जय जय स्वामी समर्थ

तूच म्हजो बापूय -आवय

शेणलां तुजे भक्तीन हांव

तुज्या चरणां मेरेन पावय